Trinkijeri pred Zadar: Sada svaka utakmica vrijedi duplo
Partizan će u hali "Aleksandar Nikolić" večeras dočekati Zadrane u utakmici 17. kola ABA lige od 20 časova.
Spremajući se za "revanš" sa Darušafakom u Evrokupu, Partizan večeras čeka Zadar koji ne bi smio da mu predstavlja nikakav problem.
- Zadar je ekipa koja je ove sezone dobila Cedevitu Olimpiju, Crvenu zvezdu i Budućnost. Mislim da to dovoljno govori. Imamo šest kola do kraja ligaškog dijela sezone i sada svaka utakmica za sve timove vrijedi duplo. Dobar pristup, koncentracija i dobra odbrana su nam potrebni da nastavimo naš put kojim smo krenuli - rekao je Trinkijeri za klupski sajt.
Bek Partizana Ognjen Јaramaz kazao je da će ovo biti važna utakmica za njegovu ekipu.
- Zadar je tim koji je ove sezone pokazao da je itekako u stanju da ugrozi najjače ekipe u ligi. Vjerujem da ćemo odigrati maksimalno koncentrisano, pokazati dobru igru i da ćemo uspeti da nastavimo s dobrim rezultatima u regionalnom šampionatu - kazao je Јaramaz.
Izabranici Andree Trinkijerija trenutno se nalaze na prvoj poziciji ABA lige, s 29 bodova, dok je Zadar na 11. mjestu s 20 bodova.