Osuda Pompeove optužbe o brisanju muslimanske kulture
Portparol kineskog Ministarstva spoljnih poslova Geng Šuang odbacio je Pompeov komentar da zatvaranje Ujgura nije povezano sa aktivnošću borbe protiv terorizma.
Pompeo je juče pozvao vlasti država centralne Azije da odbace zahtjeve Pekinga u vezi sa slanjem pripadnika nacionalnih manjina u Kinu, gdje bi, kako kaže državni sekretar SAD, mogli da budu izloženi represiji.
On je rekao da Kina pokušava da izbriše kulturu i religiju nacionalnih manjina.
Pompeo je iznio komentar tokom sastanka sa ministrima spoljnih poslova Kazahstana, Kirgistana, Tadžikistana, Turkmenistana i Uzbekistana.
Geng je istakao da su aktivnosti Kine u autonomnom regionu Sinkjang na sjeverozapadu zemlje, gdje su muslimani zatvoreni u kampove, iste kao što su ulaganje napora u borbi protiv terorizma u drugim zemljama.
Portparol je napomenuo da američki političari iznose klevete o politici Pekinga usmjerenoj prema Sinkjangu i da su se u velikoj mjeri umiješali u unutrašnja pitanja Kine, javio je AP.
- Laži političara SAD ne mogu zavarati svijet i samo će dalje da otkrivaju svoje prikrivene političke ciljeve - dodao je Geng.