Kunde u Barseloni, Suarez u Nacionalu
Nakon Roberta Levandovskog, Rafinje, Franka Kesie i Andreasa Kristiansena, novi član tima sa Kamp Noa je Žil Kunde.
23-godišnji reprezentativac Francuske prešao je iz Sevilje za 50 miliona evra, a sa Barsom je potpisao petogodišnji ugovor.
Kunde je bio dovođen u vezu i sa Čelsijem, ali je defanzivac na kraju odlučio da ostane u Španiji.
- Istina je da sam imao još jednu ponudu ali očekivali smo da će Barselona postići dogovor sa Seviljom. I kada sam osjetio da je to moguće, onda sam izabrao Barsu. Bilo mi je jasno. To je klub sa veoma ambicioznim projektom. I takođe mi se mnogo sviđa La Liga. Tako da to nije bio veliki napor za mene. Zato što sam želio da dođem ovdje - jasan je Kunde.
A nekadašnji fudbaler Barselone Luis Suarez karijeru nastavlja u domovini u Nacionalu.
Na stadionu su ga dočekale ispunjene tribine i velike ovacije. Suarez je kao 18-godišnjak 2005. seniorsku karijeru počeo u ovom klubu, prije nego što je otišao u Evropu. S urugvajskim klubom potpisao je ugovor na pet mjeseci.
- Ovdje sam zbog vas i ovdje želim da budem - iskren je bio Suarez.
Suarez se u Urugvaj vraća nakon odlične karijere, u kojoj je bilo mnogo kontroverzi.
Karijeru je gradio u Ajaksu, Liverpulu i Barseloni, gdje je činio veliku trojku zajedno sa Mesijem i Nejmarom.